وش ویب: چیئرمین پاکستان کرکٹ بورڈ ( پی سی بی ) محسن نقوی نے کرکٹ کو نچلی سطح پر فروغ دینے کیلئے قابل عمل پلان طلب کر لیا۔
چئیرمین پی سی بی محسن نقوی نے ڈائریکٹر ڈومیسٹک کرکٹ کوقابل عمل پلان سے متعلق ٹاسک دے دیا، ساتھ ہی ابھرتے ہوئے نئے کھلاڑیوں کی پروفائلنگ کی ہدایت بھی کر دی۔
چیئرمین پی سی بی کا کہنا تھا کہ اسکول، کالج اور یونیورسٹی کی سطح پر ٹیلنٹ کی تلاش کیلئے جامع حکمت عملی ترتیب دی جائے، پاکستان بھر میں اسکولز ،کالجز اور یونیورسٹیز کے درمیان ٹورنامنٹ کے انعقاد کا پلان بنایا جائے۔
محسن نقوی کا کہنا تھا کہ کرکٹ کے ٹیلنٹ کو سامنے لانے کے لیے نچلی سطح پر ٹورنامنٹ کا انعقاد ضروری ہے، ملک بھر میں کالجز اور یونیورسٹیز لیول پر خواتین کے ٹورنامنٹ بھی کرائے جائیں اور خواتین کو بھی کرکٹ کے یکساں مواقع فراہم کیے جائیں گے۔
چیئرمین پاکستان کرکٹ بورڈ نے مزید کہا کہ پاکستان میں کرکٹ کا بے پناہ ٹیلنٹ موجود ہے، اس کو سامنے بھی لانا ہے اور نکھارنا بھی ہے۔