وش ویب: کوئٹہ میں جماعت اسلامی کے صوبائی امیر مولانا عبد الحق ہاشمی ودیگر نے پریس کانفرنس کی۔
اس پریس کانفرنس میں مولانا عبد الحق ہاشمی کا کہنا تھا کہ جماعت اسلامی 12 جولائی کو اسلام آباد میں ایک دھرنے کا آغاز کر رہی ہے۔ دھرنا حق دو عوام کو کے عنوان سے ہوگا۔ دھرنا رواں مالی سال کے بجٹ میں مہنگائی کی شرح میں اضافہ اور ٹیکسز کی بھرمار کے خلاف کیا جائے گا۔ جماعت اسلامی کے صوبائی امیر کا مزید کہنا تھا کہ موجودہ حکومت عوامی مینڈیٹ کی حکومت نہیں ہے۔ موجودہ حکومت فارم 47 کی حکومت ہے۔آئی ایم ایف کے شرائط پر رواں مالی سال کے بجٹ ٹیکسز بڑھا دئیے گئے۔ اشرافیہ ٹیکسز سے مبرا ہے جبکہ غریب عوام پر ٹیکسز کی بھرمار ہے۔ کس طرح موجودہ حکومت نے آئی ایم ایف کے ظالمانہ شرائط قبول کئے۔ مولانا عبد الحق ہاشمی کا یہ بھی کہنا تھا کہ بلوچستان میں زمیندار روڈوں پر بیٹھے ہوئے ہیں۔ بلوچستان میں امن و امان کی صورتحال بھی خراب ہے۔ 9 جولائی کو بلوچستان کے تمام اضلاع میں کیمپس لگائے جائیں گے اور ہر صورت میں ہم اسلام آباد جائیں گے۔
