کوئٹہ (احسن انور): کوئٹہ میں آج محکمہ واسا کے ملازمین اور مزدوروں نے تنخواہوں، پینشنرز کی عدم ادائیگی اور الاؤنسز کی مد میں کٹوتی کے خلاف اوزار چھوڑ اور قلم چھوڑ ہڑتال کا اعلان کیا اور ساتھ ہی واسا کے دفاتر کی تالا بندی کی جس کے بعد کوئٹہ شہر کے کچھ علاقے جہاں واسا کا پانی سپلائی کیا جاتا تھا وہ بھی پانی کی سپلائی سے محروم ہوگئے۔ اس موقع پر مظاہرین نے واسا ہیڈ آفس کے احاطے میں رہتے ہوئے تنخواہوں اور پنشن کی عدم ادائیگی کے خلاف نعرے بازی بھی کی ۔ واسا ملازمین نے دو ماہ کی تنخواہوں کی تاحال عدم ادائیگی کی مذمت کرتے ہوئے کہا کہ 5 دن قبل ایدھی چوک پر احتجاج کے باوجود ملازمین کو اب تک دو ماہ کی تنخواہ ادا نہیں کی گئی جو کہ باعث تشویش ہے ۔
اپنی مشکلات سے آگاہ کرتے ہوئے واسا کے ملازمین نے وش نیوز سے بات کرتے ہوئے کہا کہ فوری طور پر ملازمین کو تنخواہیں ادا کی جائیں اور الاؤنسز کی مد میں کٹوتی بند کی جائے، اگر ایسا نہ ہوا تو بلوچستان لیبر فیڈریشن، ایپکا اور دیگر تنظیموں کے ساتھ مل کر مزید سخت لائحہ عمل کا اعلان کریں گے جس کی تمام تر ذمہ داری حکومت وقت پر عائد ہوگی۔