کوئٹہ(بلال فیروز):ملک میں جاری مہنگائی کے طوفان میں غریب افراد کے لیے عید پر نئے کپڑوں کی خریداری کرنا ناممکن ہوگیا ہے جس کے باعث کوئٹہ کے زیادہ تر شہری خود کو اور اپنے بچوں کو عید کی خوشیوں میں شریک کرنے کے لیے متبادل ذرائع استعمال کرنے پر مجبور ہیں۔
اس مقصد کے لیے سفید پوش افراد کوئٹہ کے علاقے علمدار روڈ پر ایسی مارکیٹ کا رخ کررہے ہیں جہاں مختلف اقسام کے استعمال شدہ ملبوسات مناسب قیمت پر فروخت ہو رہے ہیں
۔یہاں خریداری کرنے کے لیے آنے والے شہری کہتے ہیں کہ یہاں قیمت کم ہونے کے ساتھ سلائی کے پیسوں کی بھی بچت ہو جاتی ہے۔ مہنگائی کے اس دور میں سفید پوش شہریوں کے لیے یہ مارکیٹ کسی نعمت سے کم نہیں۔
اس حوالے سے دکاندار کا کہنا تھا کہ نئے کپڑوں کے مقابلے میں استعمال شدہ کپڑوں کی قیمتیں کئی گناہ کم ہیں مگر حکومت
کی جانب سے بیرون ملک سے آنے والے استمال شدہ کپڑوں پر ٹیکسز میں اضافے کے باعث ان کپڑوں کی قیمتوں میں بھی ماضی کے مقابلے میں اضافہ ہوچکا ہے۔