وش ویب: ملک بھر میں 21 رمضان یوم شہادت حضرت علی کرم اللہ وجہہ عقیدت و احترام سے منایا رہا ہے۔یوم علی کرم اللہ وجہہ کی مناسبت سے ملک بھر میں مجالس برپا کی جائیں گی اور جلوس نکالے جائیں گے۔
کوئٹہ میں مرکزی جلوس آج علمدار روڈ سے برآمد ہوگا جو اپنے روایتی راستوں سے ہوتا ہوا اختتام پذیر ہوگا، جلوس کی سیکورٹی کیلئے پولیس اور ایف سی کے دو ہزار افسران و اہلکار تعینات کے گئے ہیں۔ مرکزی جلوس آج علمدار روڈ سے بلوچستان شیعہ کانفرنس کے صدر حاجی محمد جواد رفیعی کی قیادت میں برآمد ہوگا۔ ڈی آئی جی کوئٹہ عبدالحئی عامر بلوچ نے بتایا کہ شہر بھر میں سیکورٹی کے سخت اقدامات کئے گئے ہیں، داخلی اور خارجی راستوں کی ناکہ بندی کر کے چیکنگ کی جارہی ہے۔ آئی جی آفس میں قائم کنٹرول روم میں جلوس کی مانیٹرنگ کرینگے۔
کراچی میں یومِ علی ؓ کا مرکزی جلوس آج دوپہر نشتر پارک سے برآمد ہوگا۔۔ جو اپنے مقررہ راستوں سے ہوتا ہوا امام بارگاہ حسینہ ایرانیہ پر اختتام پذیر ہوگا،کراچی میں یوم علی کے مرکزی جلوس کے لیے سیکیورٹی انتظامات مکمل کرلیے گئے ہیں، ایم اے جناح روڈ سمیت دیگر گزرگاہوں کو کنٹینرز لگا کر بند کردیا گیا۔سی سی ٹی وی کیمروں کی مدد سے جلوس کی مانیٹرنگ کی جائے گی۔
لاہور میں یوم حضرت علی کرم اللہ وجہہ کا مرکزی جلوس مبارک حویلی سے برآمد ہو گیا جو اپنے روایتی راستوں سے ہوتا ہوا کربلا گامے شاہ پر اختتام پذیر ہو گا، اس حوالے سے سکیورٹی سمیت دیگر انتظامات مکمل کرلیے گئے ہیں.اسلام آباد میں گزشتہ شب یوم شہادت حضرت علیؓ کا مرکزی جلوس امام بارگاہ زینبیہ سے برآمد ہو کر اپنے روایتی راستوں سے ہوتا ہوا امام بارگاہ اثنا عشری پہنچ کر اختتام پذیر ہوا۔
