وش ویب: سیکرٹری صحت بلوچستان عبداللہ خان کا پاکستان پیڈیاٹرک نیورالوجی کانفرنس کی اختتامی تقریب سے خطاب۔ سیکرٹری صحت بلوچستان عبداللہ خان نے صوبائی دارالحکومت کوئٹہ میں منعقدہ پندرہویں پاکستان پیڈیاٹرک کانفرنس 2024 کے ملکی اور بین الاقوامی شرکاء سے خطاب کرتے ہوئے کہا۔ آج کی یہ پروقار کانفرنس اور بچوں کی صحت بالخصوص نیورالوجی کے حوالے سے ایک حساس مگر بہت اہم موضوع پر کانفرنس منعقد کرنا ایک لائقِ تحسین عمل ہیں. بچوں میں اعصابی بیماریوں کے بڑہتے ہوئے چیلنج سے نمٹنے کے لیے جامع حکمت عملی کی ضرورت ہے.
پاکستان میں بچوں میں اعصابی بیماریوں کے ماہر ڈاکٹرز کی انتہائی کمی کی وجہ سے ذہنی امراض میں مبتلا افراد جو متعلقہ ماہرین تک رسائی حاصل نہیں کر سکتے وہ اپنی ذاتی، سماجی اور پیشہ ورانہ صلاحیت کو پورا کرنے سے قاصر ہیں۔ بچوں میں اعصابی بیماریوں کے بڑھتے ہوئے بحران میں کئی عوامل کارفرما ہیں۔ اس مسئلے سے نمٹنے کے لیے کثیر الجہتی حکمت عملی اپنانے کی ضرورت ہے۔ سب سے پہلے، قومی اور مقامی دونوں سطحوں پر دماغی امراض سے متعلق آگاہی مہم کو فروغ دینے کی اشد ضرورت ہے۔ بچوں میں مختلف دماغی امراض ، ان کی علامات اور بروقت پیشہ ورانہ مدد حاصل کرنے کی اہمیت کے بارے میں عوام کو آگاہ کرنا ان مسائل کو کم کرنے میں اہم کردار ادا کر سکتا ہے۔ تعلیمی اداروں کے نصاب میں ذہنی صحت کی تعلیم کو ضم کرنے سے نوجوان نسل میں ہمدردی اور افہام و تفہیم کے کلچر کو فروغ ملے گا، وہ اپنے اور دوسروں میں ذہنی پریشانی کی علامات کو پہچاننے کے قابل بنائے گا اور ذہنی صحت کے چیلنجوں سے نبرد آزما ہونے والوں کے لیے ایک معاون ماحول کو فروغ دے گا۔
اس موقع پر صدر پیڈیاٹرک نیورالوجی پروفیسر ڈاکٹر شہناز ابراہیم ، چیرمین آرگنائزنگ کمیٹی پروفیسر ڈاکٹر حبیب اللہ بابر ، پروفیسر ڈاکٹر جمال رضا ، ڈاکٹر عطاء اللہ بزنجو اور ڈاکٹر ٹیپو سلطان کے علاوہ زندگی کے مختلف شعبوں سے تعلق رکھنے والے افراد نے شرکت کی.
چیرمین آرگنائزنگ کمیٹی پروفیسر ڈاکٹر حبیب اللہ بابر نے کہا کہ پیڈیاٹرک نیورولوجی پیڈیاٹرکس کی ایک ذیلی خصوصیت ہے، جس میں بچوں کے دماغ، اعصاب اور پٹھوں کی خرابی کی دیکھ بھال شامل ہے۔
پیڈیاٹرک نیورولوجسٹ کے ذریعے بچوں میں دماغی و اعصابی بیماریوں کے لیے کثیر الضابطہ نگہداشت کی ضرورت ہوتی ہے بچوں کی ان بیماریوں کا علاچ کیا جاتا ہے۔
بچوں میں دماغی بیماریوں کی پیدائش سے متعلق پیچیدگیاں شامل ہیں جیسے پیدائش میں مشکل ، پیدائش کا کم وزن ، نوزائیدہ میں خون میں شوگر کا کم ہونا اور جینیاتی وجوہات وغیرہ شامل ہیں۔ آخر میں سیکرٹری صحت نے پندرہویں پیڈیاٹرک کانفرنس کے منتظمین اور ملکی و غیرملکی ڈاکٹرز میں تحاٸف اور یادگاری شیلڈز تقسیم کیے.