کوئٹہ ( بلال فیروز): ہزارہ ڈیمو کریٹک پارٹی کے مرکزی بیان میں چار جماعتی اتحاد کی جانب سے انتخابی نتائج میں ردوبدل اور بدترین دھاندلی کے خلاف احتجاجی تحریک کے دوران پہیہ جام ہڑتال اور قومی شاہراہوں کی کامیاب بندش کو ایک بار پھر ریفرنڈم قرار دیتے ہوئے کہاہے کہ عوام نے 8 فروری کے بعد مسلسل احتجاج، مظاہروں، قومی شاہراہوں کی بندش اور جلسوں کے ذریعے نتائج کی تبدیلی کو مسترد کرکے عوامی رائے کے ذریعے کامیاب ہونے والے حقیقی عوامی نمائندوں کی کامیابی کے آرڈر جاری کرنے کا مطالبات کررہی ہے. بیان میں کہا گیا ہے کہ پیرا شوٹرز اور مسلط کردہ افراد کو کسی صورت قبول نہیں کریں گے.
اس سلسلے میں چار جماعتی اتحاد کے قائدین اور کارکنوں نے جدوجہد کا جو راستہ اختیار کیا ہے وہ کامیابی حاصل کرنے تک جاری رہے گا کیونکہ بلوچستان کے عوام کو اصل حقائق کے بارے میں مکمل آگاہی حاصل ہوچکی ہے انتخابی نتائج میں تبدیلی کا پول کمشنر راولپنڈی لیاقت علی چٹھہ کے انکشافات کے بعد مزید مہر تصدیق ثبت ہوگئی .کمشنر کے انکشافات کے بعد اب بلوچستان کے آر اوز ،ڈی آر اوز کی اخلاقی ذمہ داری بن گئی ہے کہ وہ نتائج میں ردو بدل کرنے کی ذمہ داری قبول کرکے اس صوبے اور عوام کے ساتھ اظہار یکجہتی کریں .بیا ن میں یہ کہا گیا کہ فارم 47 میں نتائج 8 فروری سے قبل ترتیب دیا گیا تھا اور فارم 45 کے نتائج کا انتظار ہی نہیں کیا گیا جبکہ بعد میں ڈی آر اوز اور آر اوز حیران و پریشان ہوگئے تھے کہ فارم 47 کو کس طرح فارم 45 کے مطابق بناکر نتائج کو کچھ بہتر بنایا جائے،مگر ابھی تک نتائج درست نہیں ہوسکے .بیان میں کہا گیا کہ عوامی رائےکے تحفظ اور ووٹوں کے تقدس کے لئے احتجاج کا سلسلہ اس وقت تک جاری رہے گا .جب تک فارم 45 کے مطابق اصل نتائج کا اعلان نہیں کیاجاتا ہے. بیان میں چار جماعتی اتحاد کے کارکنوں کو پہیہ جام ہڑتال کو کامیاب بنانے پر خراج تحسین پیش کیا.