وش ویب:پاکستان پیپلز پارٹی کی مرکزی قیادت نے بلوچستان میں حکومت سازی سے متعلق اہم امور طے کرنے کے لئے پیپلز پارٹی کے رہنما ناصر حسین شاہ کو ذمہ داری تفویض کردی ۔
پاکستان پیپلز پارٹی کے ذرائع کے مطابق عام انتخابات میں کامیابی کے بعد پاکستان پیپلز پارٹی بلوچستان میں حکومت سازی کے لئے بہتر پوزیشن پر آگئی ہے جس کے بعد پارٹی قیادت نے فیصلہ کیا ہے کہ بلوچستان میں حکومت قائم کرنے کے لئے سیاسی جماعتوں سے معاملات کو طے کر نے کے لئے سید ناصر حسین شاہ اور اعجاز جھکرانی پر مشتمل کمیٹی تشکیل دے دی ہے ۔ذرائع کے بتایا کہ کمیٹی بلوچستان میں حکومت سازی کے لئے جلد ہی کوئٹہ آئے گی جبکہ صوبائی قیادت اور پارلیمانی اراکین کمیٹی کی معاونت کریں گے ۔ ذرائع کے مطابق ناصر حسین شاہ نے یوم تاسیس کے جلسے کے انعقاد میں بھی اہم کردار ادا کیا تھا جبکہ انہیں بلوچستان کے رسم و رواج سے شناسائی ہونے اور صوبے کی سیاسی و قبائلی شخصیات سے بہترین تعلقات ہونے کی بناءپر یہ اہم ذمہ داری دی گئی ہے ۔