وش ویب :محکمہ جنگلی حیات نے کوئٹہ میں پولیس کے ساتھ ملکر شہر کے مختلف علاقوں میں کارروائیاں کرکے نایاب نسل کے 45 جنگلی پرندے برآمد کرلیے ہیں
محکمہ جنگلی حیات کوئٹہ کے ڈپٹی کنزویٹر محمود خان کے مطابق خفیہ اطلاع ملنے پر سمگلی روڈ ، کوئلہ پھاٹک اور کاسی روڈ پر کارروائیاں کی گئیں۔ نایاب نسل کی سات کونجیں برآمد ہوئیں جنہیں قبضے میں لے لیا۔ اسی طرح کوئلہ پھاٹک سمنگلی روڈ پر کارروائی کے دوران 3 شاہین، 20 بینک مینا اور 15 بلبل برآمد کئے ۔
محکمہ جنگلی حیات کے ڈپٹی کنزویٹر نے بتایا کہ یہ تمام جنگلی اور نایاب پرندے ہیں جن کی نسل کو خطرہ ہے اس لیے وائلڈ لائف ایکٹ 2014 کے شیڈول تین کے تحت انہیں پالنا یا خرید و فروخت کرنا غیر قانونی ہے جس پر قید اور جرمانے کی سزا بھی ہوسکتی ہے۔ انھوں نے مزید بتایا کہ جنگلی اور نایاب پرندوں کی خرید و فروخت کرنے کی تحقیقات کی جارہی ہے اور تفتیش کے بعد مزید کارروائی کی جائے گی۔
ڈپٹی کنزویٹر محمود خان کا کہنا تھا کہ کونج سائبریا کا مہاجر پرندہ ہے جو سردیاں شروع ہونے سے پہلے پاکستان اور دیگر گرم ممالک کی طرف ہجرت کرتے ہیں اور موسم بہار کے آغاز پر واپس سائبریا چلے جاتے ہیں۔
