وش ویب: آل پارٹیز کے زیر اہتمام اسرائیلی جارحیت کے خلاف عالمی یوم مزاحمت منایا گیا۔
بلوچستان اسمبلی سے ملحقہ یونیٹی چوک پر فلسطینوں سے اظہار یکجہتی کے لیے احتجاجی مظاہرہ ہوا جو بعد میں جلسے کی صورت اختیار کرگیا جس میں سیاسی اور سماجی تنظیموں کے رہنماؤں ، وزیر ماحولیات نسیم الرحمن ،مولانا عبدالحق ہاشمی، مشیر برائے محکمہ لیبر اینڈ مین پاور بابا غلام رسول عمرانی و دیگر کارکنان نے شرکت کی۔ شرکا کی جانب سے اسرائیلی جارحیت کے خلاف نعرے بازی کی گئی اور کارکنوں نے بارش کے باوجود اظہار یکجہتی کے لیے مظاہرے میں شرکت کی۔اس موقع پر شرکا کا کہنا تھا کہ مسلمان ایک جسم کی مانند ہیں، ایک دوسرے کے دکھ میں کھڑے ہیں، اسرائیل اپنی جارحیت بند کرے، یوم مزاحمت کے موقع پر اسرائیلی جارحیت کے خلاف سب متحد ہیں۔
دوسری جانب مولانا عبدالحق ہاشمی کا کہنا تھا کہ حکومت اور اپوزیشن مظلوم فلسطینیوں کے ساتھ کھڑی ہے.
انکا مزید کہنا تھا کہ یوم مزاحمت سرکاری طور پر منانا خوش آئند ہے، پوری دنیا کے مسلم ممالک سے کہتے ہیں کے اس ظلم کے خلاف متحد ہوکر آواز اٹھائیں۔ یوم مزاحمت کے موقع پر سیاسی رہنماؤں کی جانب سے فلسطینی عوام کے لیے اجتماعی دعا بھی کی گئی۔
