وش ویب: بلوچستان میں اسپتالوں کی نجکاری اور کنٹریکٹ بنیاد پر بھرتی کرنے کی پالیسی کیخلاف گرینڈ ہیلتھ الائنس کیچ کے زیراہتمام ٹیچنگ اسپتال تربت سے احتجاجی ریلی نکالی گئی۔
ریلی میں مکران میڈیکل کالج اور ٹیچنگ اسپتال کے پروفیسرز ، ڈاکٹرز اور پیرامیڈیکل اسٹاف شامل تھے۔اس موقع پر وائی ڈی اے کیچ کے صدر ڈاکٹر حیات بلوچ اور پی ایم اے کیچ کے صدر ڈاکٹر میران دشتی نے خطاب کرتے ہوئے کہا کہ بلوچستان کے اسپتالوں کی نجکاری سے بوجھ غریب مریضوں پر پڑے گا، بلوچستان کے تمام ڈاکٹرز نجکاری کے خلاف متحد ہیں کیونکہ یہ ہزاروں ملازمین کے روزگار کا مسئلہ ہے۔
سرکاری اسپتالوں کی نجکاری سے صحت کے مسائل مزید بڑھیں گے، کنٹریکٹ بنیاد پر ڈاکٹرز اور پیرامیڈیکل اسٹاف بھرتی کرنے کا عمل اداروں کو تباہ کرنے کی پالیسی ہے جسکی مزمت کرتے ہیں۔
احتجاج میں ینگ ڈاکٹر ایسوسی ایشن اور پاکستان میڈیکل ایسوسی ایشن، پاکستان پیرا میڈیکل اسٹاف ایسوسی ایشن ڈسٹرکٹ کیچ اور پیرامیڈیکل اسٹاف ایسوسی ایشن ٹیچنگ اسپتال کے اراکین شامل تھے۔
