وش ویب: ڈپٹی کمشنر کیچ اسماعیل ابراہیم بلوچ نے تربت پریس کلب کا دورہ کیا اور پروگرام گندونند میں گفتگو کرتے ہوئے کہا کہ تعلیم اور صحت کے شعبہ جات کی بہتری ان کی ترجیحات میں سرفہرست ہیں .
تفصیلات کے مطابق ڈپٹی کمشنر کیچ اسماعیل ابراہیم بلوچ نے تربت پریس کلب کا دورہ کیا اور پروگرام گندونند میں گفتگو کرتے ہوئے کہا کہ تعلیم اور صحت کے شعبہ جات کی بہتری ان کی ترجیحات میں سرفہرست ہیں تاہم دیگر شعبوں کی بہتری کیلئے بھی وہ ہمہ وقت کوشاں ہیں اس سرزمین کا فرزند ہونے کے ناطے وہ یہاں کے سوشیو اکنامک مشکلات کا اچھی طرح ادراک رکھتے ہیں. تاہم تعلیم وصحت کا شعبہ بنیادی اہمیت کا حامل ہونے کے باعث بھرپور توجہ کے متقاضی ہیں۔ تعلیم وصحت کے شعبے میں غیرحاضری پر زیرو ٹالرنس کی پالیسی ہے، تعلیم وصحت کے شعبے میں غیرحاضر اسٹاف کے خلاف موثر محکمانہ کاروائیاں کی جارہی ہیں، کیچ میں اس وقت تعلیمی شرح 63فیصد ہے۔ اسماعیل ابراہیم بلوچ نے مزید کہا کہ محکمہ تعلیم میں اسٹاف کی کمی پورا کرنے کیلئے ایس بی کے بھرتیوں کا عمل آخری مراحل میں ہے جبکہ وزیراعلیٰ بلوچستان کی خصوصی دلچسپی کی بدولت صوبہ بھر میں اساتذہ کی خالی آسامیوں پر بھرتی شروع کی جارہی ہے۔ ڈی سی کیچ کا یہ بھی کہنا تھا کہ ضلع کیچ میں تعطل کے شکار مختلف ترقیاتی منصوبوں پر کام کی رفتار تیز کرنے کیلئے کمشنرمکران کی سربراہی میں تیزی سے اقدامات جاری ہیں اور سیکورٹی معاملات کوبہتر بناکر اسکیموں کی پروگریس بہتربنائی جارہی ہے۔