وش ویب: بلوچستان کے ضلع پشین میں لیویز چوکی پر مسلح افراد کی فائرنگ سے دو لیویز اہلکار جاں بحق ہوگئے.
لیویز اور پولیس نے شہر بھر کی ناکہ بندی کرکے سرچ آپریشن شروع کردیا۔لیویز حکام کے مطابق پشین کے علاقے کلی ملیزئی روڈ پر موٹرسائیکل پر سوار مسلح افراد نے لیویز چوکی پر فائرنگ کردی، فائرنگ سے دو لیویز اہلکار یاسر الیاس اور عبدالقدیر جاں بحق ہوگئے۔حکام کے مطابق فائرنگ کے واقعے کے بعد لیویز اور پولیس نے شہر بھر کی ناکہ بندی کرکے سرچ آپریشن شروع کردیا۔حکام کے مطابق واقعے میں جاں بحق اہلکاروں کی لاشیں اسپتال منتقل کردی گئیں، ڈاکٹروں نے بتایا کہ دونوں اہلکاروں کو 3-3 گولیاں لگی ہیں۔حکومت بلوچستان نے پشین لیویز چیک پوسٹ پر حملے کی مذمت کرتے ہوئے شہید اہلکاروں کو خراج عقیدت پیش کرتے ہوئے کہا کہ لیویز چیک پوسٹ پر حملہ ناقابل معافی جرم ہے، واقعے میں ملوث عناصر کو کیفر کردار تک پہنچایا جائے گا۔
