وش ویب: کوئٹہ میں بجلی کی 8 سے 12 گھنٹے تک اعلانیہ و غیر اعلانیہ لوڈشیڈنگ کا سلسلہ جاری ہے۔
جناح ٹاوٴن، سریاب، قمبرانی، جان محمد روڈ، جناح روڈ، ائیرپورٹ روڈ کے اطراف میں لوڈشیڈنگ کی جارہی ہے۔مختلف علاقوں میں بجلی کی طویل لوڈ شیڈنگ سے شہری پریشان ہو گئے ہیں۔ شہر کے کاروباری علاقوں میں اعلانیہ اور غیر اعلانیہ لوڈ شیڈنگ سے تاجر برادری کو بھی مشکلات کا سامنا کرنا پڑرہا ہے۔ عوامی حلقے کا کہنا تھا کہ کیسکو نے اضافی لوڈشیڈنگ کو معمول بنا لیا ہے۔ سخت گرمی میں خواتین، بچے، بوڑھے اور بیمار ذہنی اذیت میں مبتلا ہو رہے ہیں۔ باقاعدگی سے بل ادا کرنے کے باوجود بجلی کی طویل بندش سمجھ سے بالا ہے۔