کوئٹہ میں صوبائی وزیر تعلیم راحیلہ حمید خان درانی کی ہدایت پر جامعات بلوچستان کے وائس چانسلرز کا ہنگامی اجلاس طلب کیا گیا ،اجلاس میں بلوچستان کی دیگر جامعات کے وائس چانسلرز نے آن لائن شرکت کی ، جبکہ صوبائی سیکریٹری ہائیر ایجوکیشن اور کالجز حافظ طاہر اور جونیئر پولیٹیکل سیکریٹری عطا الرحمن نے خصوصی طور پر شرکت کی۔
اجلاس میں بسیمہ بس حادثے میں شہید ہونے والے پروفیسرز اور دیگر شہدا کے لئے مغفرت اور بلند درجات کی دعا کی اور ہائیر ایجوکیشن کمیشن کی جانب سے حالیہ بجٹ میں کٹوتی کو زیر بحث لایا گیا اور بحث کی گئی کہ اگر ایچ ای سی کی جانب سے بجٹ نہیں ملا تو کیا صوبائی حکومت بلوچستان کی جامعات کو چلانے کے لئے بجٹ مختص کرے گی یا نہیں ،دوسری جانب اٹھارویں ترمیم کے بعد یہ گتھی بھی ابھی نہ سلجھ سکی کی جامعات ہائیر ایجوکیشن کمیشن کے زیر اثر ہیں یا صوبائی حکومت کے ،اس سلسلے میں مختلف تجاویز زیر بحث آئیں،.
اجلاس میں مشاورت کے بعد فیصلہ کیا گیا کہ تمام جامعات کے وی سی پر مشتمل ایک وفد گورنر شیخ جعفر خان مندوخیل،وزیر اعلی سرفراز بگٹی، اور چیف سیکرٹری شکیل قادر سے ملاقات کرینگے جبکہ یہ وفد بعد میں اسلام آباد میں وزیراعظم پاکستان میاں محمد شہباز شریف سمیت دیگر اعلیٰ حکام سے بھی ملاقاتیں کرے گا، اجلاس میں فیصلہ ہوا کہ صوبائی وزیر تعلیم اور صوبائی حکومت کی جانب سے اعلی حکام کو خط بھی ارسال کئے جائیں گے ،جبکہ معاونت کے لئے قانونی ماہرین کی بھی ٹیم تشکیل دی جائے گی واضح رہے کہ ایک جانب بلوچستان کی جامعات شدید مالی بحران کا شکار ہیں تو دوسری جانب بلوچستان اسمبلی سے مزید یونیورسٹیوں کے قیام کیلئے قراردادیں پاس کرائی جارہی ہیں،اگر حکومت نے بروقت اقدامات نہیں اٹھائے تو مستقبل میں بلوچستان کے طالب علموں کے لئے اعلیٰ ڈگری کا حصول صرف ایک خواب بن کر رہ جائے گا اس لئے حکومت صوبائی ہائیر ایجوکیشن کمیشن کا قیام عمل میں لاکر بلوچستان کی جامعات کو فنڈز کے مسئلے کو مستقل بنیادوں پر حل کریں۔
اس موقع پر وائس چانسلر بیوٹمز پروفیسر ڈاکٹر خالد حفیظ نے کہا کہ ہائیر ایجوکیشن کمیشن کی جانب سے صوبوں کی جامعات کے لئے فنڈز ختم کرنے کے فیصلے کے بعد جامعات کے لئے بڑی پریشانی ہے اور بلوچستان میں اعلیٰ تعلیم کا خواب ادھورا اور تعلیم کا مستقبل بھی مخدوش ہونے جا رہا ہے۔ رواں مالی سال کے اختتام کے بعد کوئی فنڈ نہیں ملے گا۔
یاد رہے اجلاس میں وزیر تعلیم خود نہیں ائے جبکہ ہنگامی اجلاس انھیں کی طرف سے بلایا گیا تھا اور ایک پریس بریفنگ بھی دینی تھی جو وہ معطل کر چکے ہیں
