وش ویب : پاکستان کی نامور میزبان و اداکارہ مایا خان نے لڑکیوں کے رشتے دیکھنے آنے والی خواتین کے رویے کے خلاف آواز بلند کی ہے۔
حال ہی میں سوشل میڈیا پر مایا خان کی ایک ویڈیو منظر عام پر آئی جس میں وہ پاکستان میں رشتہ کلچر سے متعلق بات کررہی ہیں۔
انہوں نے کہا کہ لڑکیاں شو روم میں رکھا کوئی سجاوٹ کا سامنا نہیں ہیں جنہیں دیکھیں اور ریجیکٹ کردیں۔
مایا خان نے ویڈیو پیغام میں شادی کی منتظر لڑکیوں کو مخاطب کرتے ہوئے کہا کہ آپ سے بات کر رہی ہوں جس کے گھر لوگ آئے چائے پی، کچھ سموسے کھائے، باتیں بنائیں اور کہا کہ ہمیں سوچنے کے لیے کچھ وقت چاہیے اور چلے گئے۔
انہوں نے مزید کہا کہ آپ وہ جس کے گھر لوگ آئے چائے پی، کچھ کھائے، اور کچھ دنوں کے بعد کہا کہ استخارہ ٹھیک نہیں آیا، آپ وہ، جو اس انتظار میں رہتی ہیں کہ آج بڑوں نے کہا ہے کہ آج پھر کوئی آنے والا ہے، آپ، جسے کہا جاتا ہے کہ دفتر سے جلدی گھر آنا، آج کوئی دیکھنے کے لیے آنے والا ہے، آپ جو یہ سوچ سوچ کے تھک گئی ہیں کہ کیا میں شوروم میں رکھا شو پیس ہوں؟
مایا خان کا کہنا تھا کہ لڑکیاں اپنی زندگی کے قیمتی سال، قیمتی راتیں، سنہرے دن صرف اس فکر میں گزار دیتی ہیں کہ شاید اب جو لوگ دیکھنے کے لیے آئیں گے وہ رشتہ پکا کردیں گے یا پھر اب جو لوگ آئیں گے وہ کیا جواب دیں گے، ایسی تمام لڑکیوں کو صرف اتنا ہی کہوں گی کہ آپ شوروم میں رکھا کوئی سجاوٹ کا سامان نہیں ہیں جو کسی کی ہاں کی منتظر رہیں۔
سوشل میڈیا صارفین بھی اداکارہ کی ویڈیو پر اپنے خیالات کا اظہار کررہے ہیں، صارفین کا کہنا ہے کہ استخارے کا بہانا وہی لوگ کرتے ہیں جنہیں رشتہ نہیں کرنا ہوتا۔
