مستونگ (فیض دارنی): مستونگ سے لاپتہ افراد کے لواحقین کا دھرنا کامیاب مذاکرات کے بعد ختم ہوگیا.
مستونگ سے لاپتہ عبدالطیف کے اہلخانہ سمیت دیگر 4 لاپتہ افراد کے اہل خانہ ، عزیز و اقارب اور علاقہ مکینوں نے ان کے بحفاظت بازیابی کے لئے کوئٹہ کراچی قومی شاہراہ کو نواب ہوٹل کے مقام پر بلاک کرکے دھرنا دیا ہوا تھا، جس میں وائس فار بلوچ مسنگ پرسنش کے صدر نصراللہ اور ماما قدیر بلوچ نے بھی شرکت کی۔ گزشتہ شب ڈپٹی کمشنر مستونگ سمیت دیگر حکام نے مظاہرین سے مذاکرات کئے مگر مذاکرات کامیاب نہ ہوسکے۔ جس سے 28 گھنٹوں سے قومی شاہراہ بند ہے اور ٹریفک معطل ہونے کی وجہ سے سڑک کی دونوں جانب گاڑیوں کی لمبی لمبی قطاریں لگ گئیں۔ ٹرانسپورٹروں اور مسافروں کو شدید دشواری کا سامنا رہا۔ مگر آج دہرنے کے منتظمین سے مذاکرات کے کامیاب ہونے کے بعد 29 گھنٹے بعد قومی شاہراہ کو بحال کردیا گیا۔ مظاہرین سے کرنل ایف سی، ڈپٹی کمشنر، ایس ایس پی اور اسٹنٹ کمشنر نے کامیاب مذاکرات کئے۔ 15 دن میں لاپتہ افراد کو منظر عام پر لانے کی یقین دہانی کروائی گئی ہے۔
