وش ویب: آرمی چیف جنرل سید عاصم منیر نے کراچی میں آئیڈیاز 2024 کا خصوصی دورہ کیا اور دوست ممالک کے دفاعی مینو فیکچررز کی فعال شراکت کو سراہا۔
آئی ایس پی آر کے مطابق آرمی چیف جنرل عاصم منیر نے کراچی ایکسپو سینٹر میں جاعری بین الاقوامی دفاعی نمائش اور سیمینار آئیڈیاز کا خصوصی دورہ کیا۔ آرمی چیف نے دورہ کےد وران دوست ممالک کے دفاعی مینو فیکچررز کی فعال شرکت کو سراہا۔ نمائش میں کل 557 نمائش کنندگان شرکت کررہے ہیں جن میں سے 333 بین الاقوامی نمائش کنندگان ہیں جبکہ 224 ملکی نمائش کنندگان ہیں، 36 ممالک نے نمائش کنندگان کے اسٹالز لگائے جن میں سے 17 ممالک پہلی بات شرکت کررہے ہیں۔
ایونٹ میں 53 ممالک کے 300 سے زائد غیر ملکی مندوبین نے شرکت کی اور نمائش اور پاکستان کی دفاعی صنعت پر مکمل اعتماد کا اظہار کیا۔ آرمی چیف نے تقریب میں موجود غیر ملکی فوجی حکام اور دفاعی مندوبین کے ساتھ بامعنی بات چیت بھی کی۔ اس موقع پر ایک اہم بات گلوبل انڈسٹریل ڈیفنس سلوشنز پاکستان کی طرف سے تیار کردہ جدید ترین ڈرون شاہپر تھری کا افتتاح تھا۔
شاہپر تھری اعلیٰ درجے کی صلاحیتوں کا حامل ڈرون ہے، جو 35 ہزار فٹ کی آپریشنل اونچائی پر پرواز کی صلاحیت رکھتا ہے اور 24 گھنٹے سے زیادہ پرواز کرسکتا ہے، یہ ڈرون بموں، میزائلوں اور تارپیڈ و سمیت وسیع پیمانے پر گولہ بارود لے جانے کی صلاحیت رکھتا ہے۔ آئیڈیاز 2024 کا 12 واں ایڈیشن 19 نومبر کو شروع ہوا اور 22 نومبر 2024 کو اختتام پذیر ہوگا۔
قبل ازیں آرمی چیف کی کراچی آمد پر کور کمانڈرز لیفٹیننٹ جنرل بابر افتخار نے پرتپاک استقبال کیا۔
