وش ویب: کوئٹہ جامعہ بلوچستان اورایس آئی یوکے پاکستان کے مابین ایک مفاہمتی یادداشت کے سمجھوتے پر دستخط کئے گئے۔
مفاہمتی یادداشت پر جامعہ بلوچستان کے پرو وائس چانسلر ڈاکٹر محمد عالم ترین اور ایس آئی یوکے کے کنٹری منیجر وقاص عباسی نے دستخط کیئے۔ اس موقع پر جامعہ کے متعلقہ افسران بھی موجود تھے۔ باہمی سمجھوتے کے تحت دونوں ادارے تعلیمی ، تحقیقی، تربیتی سرگرمیوں کو مشترکہ طور پر فروغ دینے سمیت تعاون و اشتراک عمل سے تعلیمی معیار میں بہتری لائیں گے۔
سمجھوتے کے مطابق یونیورسٹی آف بلوچستان کے طلباء وطالبات کو ایس آئی یوکے بیرون ملک مفت مطالعہ اور کیریئر کونسلنگ کی خدمات فراہم کرے گی ۔ اور جامعہ کے طلبہ کو وظائف اور مالی امداد کے بارے میں مطلع کرے گا اور اپنے تعلیمی پروگرامز میں شرکت کے لئے جامعہ کے طلبہ اور فیکلٹی کو مدعو کرے گا۔
اس موقع پر جامعہ کے پرووائس چانسلر نے کہا کہ باہمی سمجھوتے سے تعلیمی، تحقیقی و تربیتی سرگرمیوں کو پروان چڑھایا جائے گا اور شعبہ جات کو جدید ٹیکنالوجی سے منسلک کرنے سمیت افرادی قوت کے صلاحیتوں کو دور جدید کے تقاضوں سے آراستہ کیا جائے گا۔جس کا مقصد صوبے میں اعلیٰ تعلیم کے فروغ اور ترقیاتی و مستقبل کے منصوبوں کو جدید اور سائنسی بنیادوں پر بروئے کارلانا ہے۔
