وش ویب: تربت میں بلوچ اسٹوڈنٹس ایکشن کمیٹی کے زیر اہتمام بلوچستان یونیورسٹی کے تین سالوں سے لاپتہ طلباء سہیل بلوچ اور فصیح بلوچ کی بازیابی کے لیے احتجاجی ریلی نکالی گئی۔

ریلی عطاء شاد ڈگری کالج سے شروع ہو کر شہید فدا احمد چوک پر اختتام پذیر ہوئی، جہاں طلباء نے بھرپور احتجاجی مظاہرہ کیا۔ احتجاج میں کثیر تعداد میں طلباء نے شرکت کی اور لاپتہ بلوچ طلباء کی فوری بازیابی کا مطالبہ کیا۔ریلی سے بساک کے مرکزی چیئرمین شبیر بلوچ، سبغت اللہ شاہ ، لاپتہ طالبعلم خدادا نور اور عطا نور کی بہن سمیت دیگر مقررین نے خطاب کیا۔

مقررین نے حال ہی میں اسلام آباد سے لاپتہ کیے گئے 10 بلوچ طلباء کے واقعے کی شدید مذمت کرتے ہوئے کہا کہ یہ عمل ناقابل قبول ہے۔ انہوں نے حکومت سے مطالبہ کیا کہ سہیل بلوچ، فصیح بلوچ اور تمام لاپتہ بلوچ افراد کو فوری طور پر بازیاب کیا جائے۔ احتجاج کے دوران بلوچ طلباء کی جانب سے ایک ٹیبلو بھی پیش کیا گیا، جس میں ان کے مطالبات اور جذبات کو اجاگر کیا گیا۔