وش ویب: خلیج بنگال میں بننے والا سمندری طوفان دانا بھارت پر اثر انداز ہونا شروع ہوگیا۔
بھارتی میڈیا کے مطابق ریاست بنگال اور اڑیسہ میں سمندری طوفان دانا کی وجہ سے ہائی الرٹ جاری کردیا گیا ہے، طوفان کے خدشے کے پیش نظر 10 لاکھ کے قریب افراد اپنے گھر چھوڑ کر محفوظ مقام پر منتقل ہو رہے ہیں جبکہ تمام تعلیمی اداروں کو بھی بند کردیا گیا ہے اور 200 کے قریب ٹرینوں کو بھی معطل کر دیا گیا ہے۔
ادھر بھارتی محکمہ موسمیات کا بتانا ہے کہ مشرقی وسطیٰ خلیج بنگال پر ہوا کا دباؤ 6 کلومیٹر فی گھنٹہ کی رفتار کے ساتھ مغرب شمال مغرب کی جانب بڑھ رہا ہے جو بدھ تک طوفان کی شکل اختیار کر جائے گا۔
محکمہ موسمیات کے مطابق یہ طوفان 24 اکتوبر کی رات اور 25 اکتوبر کی صبح 100یا 110 کلومیٹر فی گھنٹہ کی رفتار سے شمالی اڑیسہ اور مغربی بنگال کے ساحلوں سے ٹکرائے گا۔
محکمہ موسمیات کے مطابق اس دوران طوفانی ہوائیں 120 کلو میٹر فی گھنٹہ کی رفتار سے چلیں گی، اس کے ساتھ ہی شدید بارشوں کی پیشگوئی بھی کی جارہی ہے جبکہ ماہی گیروں کو سمندر میں جانے سے گریز کی ہدایت کی گئی ہے۔
