وش ویب: سائٹ ایریا میٹروول کے قبرستان سے خاتون کی لوہے کی پیٹی میں بند ہاتھ پاؤں بندھی تشدد زدہ لاش ملی ہے۔
ڈی آئی جی ساؤتھ اسد رضا کے مطابق سائٹ ایریا میٹروول میں شہید قبرستان سے لوہے کی پیٹی میں خاتون کی لاش ملی، خاتون کی لاش کے ہاتھ پاؤں بندھے ہوئے ہیں اوربظاہر لگتا ہے کہ خاتون کو تشدد کرکے قتل کیا گیا ہے۔
مقتولہ کی شناخت شازیہ کے نام سے کرلی گئی۔ واقعے کی اطلاع ملنے پر مقتولہ کے اہلخانہ اسپتال پہنچ گئے اور تدفین کے لئے لاش کے ہمراہ روانہ ہوگئے۔
اہلخانہ نے بتایا کہ شازیہ گزشتہ روز دوپہر 11 بجے گھر سے فیکٹری جانے کیلئے نکلی تھی، لیکن رات 9 بجے تک گھر واپس نہ پہنچنے پر تشویش ہوئی تو اس کی تلاش شروع کی۔
لواحقین کے مطابق اسپتال میں ایمبولینس ڈرائیور نے بتایا کہ سائٹ ایریا سے لاش ملی ہے، اسپتال پہنچے تو شازیہ کو پہچان لیا۔
شازیہ کی شادی 2003 میں ہوئی اور اس کے 5 بچے ہیں، جبکہ اس کا شوہر درزی کا کام کرتا ہے۔ پوسٹ مارٹم میں بتایا گیا کہ شازیہ پر تشدد کے بعد اسے گلہ دبا کر قتل کیا گیا۔
