وش ویب : وفاقی وزیر دفاع خواجہ آصف نے آئینی ترمیم کے حوالے سے کہا ہے کہ سربراہ جمعیت علماء اسلام ( جے یو آئی ) مولانا فضل الرحمان نے حکومت کی حمایت نہیں کی ہے۔مجوزہ آئینی ترامیم کے حوالے سے قومی اسمبلی اور وفاقی کابینہ کا اجلاس پیر ( آج ) کی صبح تک کے لیے ملتوی کردیا گیا ہے۔
قومی اسمبلی کا اجلاس ملتوی ہونے کے بعد پارلیمنٹ کے باہر میڈیا سے گفتگو کرتے ہوئے وزیر دفاع خواجہ آصف کا کہنا تھا کہ لگتا ایسا ہی ہے آئینی ترمیم کے لئے حکومت کے پاس نمبر پورے نہیں ہیں، میں صبح سے قومی اسمبلی میں موجود تھا تو حقیقت کا معلوم نہیں ہے لیکن لگتا یہی ہے نمبر پورے نہیں تھے اسی لیے قانون سازی نہیں ہوئی اور اجلاس ملتوی ہوگیا۔وزیر دفاع کا کہنا تھا کہ آئینی ترمیم کے حوالے سے مطلوبہ تعداد کے بارے میں صورتحال صبح واضح ہوجائے گی۔خواجہ آصف کا مزید کہنا تھا کہ آئینی ترامیم کے حوالے سے مولانا فضل الرحمان نے حکومت کی حمایت نہیں کی۔
