وش ویب: بی این پی عوامی کے رکن میر اسد اللہ بلوچ نے کہا کہ وفاقی ملازمتوں میں 6 فی صد بلوچستان کا کوٹہ ہے مگر اس پر عمل درآمد نہیں ہو رہا ہے.

تفصیلات کے مطابق بلوچستان اسمبلی کے اجلاس میں پوائنٹ آف آرڈر پر اظہار خیال کرتے ہوئے بی این پی عوامی کے رکن میر اسد اللہ بلوچ نے کہا کہ وفاقی ملازمتوں میں 6 فی صد بلوچستان کا کوٹہ ہے مگر اس پر عمل درآمد نہیں ہو رہا ہے. کوسٹ گارڈ میں بلوچستان کے لوگ نہیں ہیں بلوچستان کے ساتھ جہاں زیادتی ہو رہی ہے اس کا نوٹس لیا جائے ۔ انہوں نے کہا کہ بلوچستان کو کالونی مت سمجھیں کوسٹ گارڈ والے بلوچستان کے لوگوں کو ذلیل کرتے ہیں اسمبلی میں ہمارا کام کیا ہے ، امن کے طلب گار روزانہ باتیں کرتے ہیں مگر عزت نہیں دیتے تھانے ، عدالت اور اسمبلی سے لوگ مایوس ہیں ۔ اسد بلوچ نے کہا کہ اگر لوگوں کی بات نہ سنی گئی تو حالات خراب ہوں گے. بلوچستان کے حالات اس وقت ٹھیک ہوں گے جب شفاف الیکشن ہوں.

جس کے جواب میں وزیر اعلی میر سرفراز بگٹی نے کہا کہ کوسٹ گارڈ حکام کو بلوائیں گے. اسداللہ بلوچ کی بات سے 200 فیصد متفق ہوں ۔ ان سے پوچھے گے، کوسٹ گارڈ حکام کو بلوائیں گے اور اور اسد اللہ بلوچ کو بھی اس میٹنگ میں شامل کرینگے۔ اسپیکر ایوان کو رول کے مطابق چلائیں ، جس پر اسپیکر نے کہا کہ اسمبلی کو و قوائد کے مطابق چلائیں گے۔