کویٹہ ( بلال فیروز ):کویٹہ میں سابق ایرانی صدر شہید ابراہیم رئیسی کی یاد میں ایک علمی و بہتر سفارتی تعلقات کانفرنس کا انعقاد کیا گیا۔ کانفرنس میں ایرانی قونصل جنرل حسین درویشمند، کویٹہ ڈیولپمنٹ محاذ کے سربراہ عبد المتین اخوانزادہ، خانہ فرہنگ ایران کے ڈی جی امیری، بلوچستان نیشنل پارٹی کے صوبائی رہنما غلام نبی مری سمیت دیگر مکتبہ فکر سے تعلق رکھنے والے افراد نے کثیر تعداد میں شرکت کی۔ اس کانفرنس میں سابق ایرانی صدر ابراہیم رئیسی کا پاکستان کیلئے جذبات و لگاؤ، پاکستانی حکومت اور عوام کا شہید ابراہیم رئیسی کے بارے میں جذبات و احساسات اور مستقبل قریب میں پاک ایران تعلقات کی نئی جہتیں جیسے موضوعات پر تقاریر کی گئیں۔
مقررین نے مزید کہا کہ شہید ابراہیم رئیسی کی پاک ایران تعلقات کی بہتری کیلئے دی گئی خدمات ہمیشہ یاد رکھی جائیں گی ۔ انہوں نے مزید کہا کہ موجودہ حکومت کو پاک ایران تعلقات کی مضبوطی کیلئے اقدامات کرنے کی ضرورت ہے کیونکہ تقریبا پورے بلوچستان کی عوام ایرانی اشیاء کی خرید و فروخت کر کے ہی اپنی معیشت کا پہیہ چلا رہی ہے۔
