وش ویب: کوئٹہ پریس کلب کے سامنے پاکستان مرکزی مسلم لیگ کے زیر اہتمام عام عوام کی موجودگی میں بجلی کے اضافی بلوں کے خلاف احتجاجی مظاہرہ کیا گیا۔
احتجاجی مظاہرے میں کوئٹہ کے شہریوں اور پارٹی کے کارکنان کی کثیر تعداد موجود تھی ،جنہوں نے ہاتھوں میں بینرز اور پلے کارڈز اٹھا رکھے تھے، جس پر صوبے کو بجلی فراہم کرنے والی کمپنی کیسکو اور واپڈا کے خلاف نعرے درج تھے ۔احتجاجی مظاہرے میں شریک مظاہرین حکومت وقت سے ایک ہی سوال کرتے نظر آئے کہ ہم بجلی کا بل ادا کریں یا روٹی کھائیں ؟؟
مظاہرین کا مزید کہنا تھا کہ کیسکو کی جانب سے شہر میں بتدریج لوڈ شیڈنگ کی جارہی ہے جس کے باعث شدید گرمی میں کوئٹہ کے کاروباری طبقے سمیت ہر شہری سخت اذیت اور کوفت میں مبتلا ہے جبکہ کیسکو کی جانب سے ہر مہینے باقاعدگی سے اضافی ریٹس لگا کر بل بھیجے جارہے ہیں ۔ مظاہرین نے کہا کہ بلوچستان اسمبلی میں بھی اجلاس کے دوران بجلی کی لوڈ شیڈنگ حکومت کی ناکامی کا منہ بولتا ثبوت ہے ۔ لہذا مظاہرین نے حکومت کو مخاطب کرتے ہوئے کہا ہے کہ کیسکو اور واپڈا کے ناروا سلوک اور کارکردگی کا نوٹس لیتے ہوئے متعلقہ عہدیداران کے خلاف کاروائی کی جائے بصورت دیگر ہم سخت احتتاجی راستہ اپنانے پر مجبور ہونگے۔
