کوئٹہ:پاکستان ٹریڈ یونین اور مختلف تنظیموں کے زیر اہتمام گیس کے اضافی بلز اور دیگر مسائل کے خلاف احتجاجی مظاہرہ کیا گیا.
کوئٹہ میں پاکستان ٹریڈ یونین ڈیفنس کی کمپین کے زیر اہتمام بلوچستان کی مختلف فیڈریشنز ،ٹریڈ یونینز ،ایسوسی ایشنز اور مزدور و محنت کشوں کی تنظیموں کی جانب سے سوئی گیس کے اضافی بلز، سرکاری محکموں کی نجکاری،ڈائون سائزنگ ،اصلاحات کے نام پر پنشن کو ختم یا اسے محدود کرنے ،جامعہ بلوچستان، بی ڈی اے ،کوئٹہ میٹروپولیٹن کارپوریشن اور واسا سمیت مختلف محکموں میں تنخواہوں کی عدم ادائیگی و دیگر مطالبات کے حق میں کوئٹہ میٹروپولیٹن کارپوریشن کے سبزہ زار سے ایک پر ہجوم ریلی نکالی گئی اور کوئٹہ پریس کلب کے سامنے احتجاجی مظاہرہ کیا گیا ۔ احتجاجی مظاہرے میں مختلف محکموں کے حاضر سروس اور ریٹائرڈ ملازمین کثیر تعداد میں موجود تھے جو کہ “جینے کا حق دو” جیسے نعرے لگاتے دکھائی دیئے ۔
مظاہرین نے مطالبات پیش کیے کہ ملک میں بڑھتی ہوئی مہنگائی پر قابو پایا جائے ، بجٹ بناتے ہوئے آئی ایم ایف کی شرائط پر عمل درآمد نہ کیا جائے اور پنشنز پر کٹ نہ لگایا جائے، سرکاری محکموں کی پرائیویٹائزیشن نہ کی جائے، تنخواہوں میں 200 فیصد اضافہ کیا جائے، سوئی سدرن گیس کمپنی کے ناروا سلوک کا نوٹس لیا جائے اور محکمہ کے خلاف کارروائی کی جائے ، مزدوروں کو تحفظ دیا جائے بصورت دیگر ہم سول نافرمانی اور سخت لائحہ عمل تیار کرنے پر مجبور ہونگے۔
