وش ویب:بولان میڈیکل کمپلیکس اسپتال میں بدعنوانی کی شکایات پر تحقیقات شروع کردی گئی ، گذشتہ روز اینٹی کرپشن کا عملہ تحقیقات کے لئے بی ایم سی پہنچا اور کباڑ خانے سے برآمد ہونے والی زائد المیعاد ادویات اور سی ٹی اسکین مشین کا جائزہ لیا.
عملے نے اسپتال کے میڈیکل سپرنٹنڈنٹ سے بھی پوچھ گچھ کی۔
ڈائریکٹر جنرل اینٹی کرپشن اسٹیبلشمنٹ بلوچستان عبدالواحد کاکڑ کی ہدایت پر ڈپٹی ڈائریکٹر انویسٹی گیشن کامران بشیر، اسسٹنٹ ڈائریکٹر انویسٹی گیشن محمد ایاز، اسسٹنٹ ڈائریکٹر انویسٹی گیشن عبدالقیوم اور اسسٹنٹ ڈائریکٹر انویسٹی گیشن قمبر بلوچ پر مشتمل اے سی ای بی کوئٹہ کی انویسٹی گیشن ٹیم نے بولان میڈیکل کمپلیکس اسپتال کوئٹہ کے بند کباڑ خانوں سے برآمد شدہ سی ٹی سکین اور معیاد ختم ہونے والی ادویات کی گمشدگی سے متعلق شکایت کی تحقیقات کے لیے کمپلیکس کا دورہ کیا۔
تحقیقاتی ٹیم کو ڈاکٹر امین مندوخیل میڈیکل سپرنٹنڈنٹ اور ڈاکٹر زینت ترین ڈپٹی میڈیکل سپرنٹنڈنٹ بی ایم سی ایچ کوئٹہ نے بریفنگ دی۔ٹیم نے گوداموں کا دورہ کیا جہاں سے زائد المیعاد ادویات کے نمونے حاصل کیے گئے۔دورے کے دوران سی ٹی سکین اور دیگر آلات اور مشینری کو بھی چیک کیا گیا۔
اینٹی کرپشن ٹیم کا کہنا ہے کہ معاملے کی مکمل تفتیش جاری ہے جس میں جلد ہی انکوائری مکمل کر لی جائے گی۔