وش ویب: بلوچستان عوامی پارٹی کے سیکرٹری اطلاعات و سینیٹر کہدہ بابر نے وزیرا عظم پاکستان میاں محمد شہباز شریف کے دورہ گوادر کو خوش آئند قرار دے دیا
تفصیلات کے مطابق بلوچستان عوامی پارٹی کے سیکرٹری اطلاعات و سینیٹر کہدہ بابر نے وزیرا عظم پاکستان میاں محمد شہباز شریف کے دورہ گوادر کو خوش آئند قرار دیتے ہوئے کہا ہے کہ گوادر کے لئے خصوصی پیکج دیا جائے تاکہ معمولات زندگی بحال ہوسکے اور لوگوں کے یوٹیلٹی بلز معاف کئے جائیں. اپنے جاری کردہ بیان میں انہوں نے کہا کہ وزیر اعظم میاں محمد شہباز شریف نے اپنے عہدے کا حلف اٹھانے کے اگلے روز بارش سے متاثر ہونے والے ساحلی شہر گوادر کا دورہ کیا ، متاثرین کی بحالی اور بہتری کے لئے خصوصی پیکج دیا جائے اور گوادر کو اسپیشل ڈسٹرکٹ قرار دیکر بارڈر ٹریڈ کی شرائط آسان کی جائے تاکہ لوگوں کو روزگار کے مواقع میسر آسکیں اور ان کا ذریعہ معاش کا سبب بنارہے.شہر کو جلد از جلد وفاقی حکومت کی جانب سے ٹیکس فری زون قرار دیا جائے .ان اقدامات سے شہریوں کے لئے روزگار کے نئے مواقع پیدا ہوں گے اور گوادر کے لوگوں کو اپنے پاﺅں پر کھڑا ہونے میں مدد ملے گی۔
