وش ویب: بلوچستان نیشنل پارٹی کے ممبر سنٹرل ایگزیکٹیو کمیٹی و ضلعی صدر بی این پی کوئٹہ غلام نبی مری نے اپنے ایک بیان میں حالیہ دھاندلی زدہ الیکشن کے خلاف چارجماعتی اتحاد کا ڈی سی آفس کے سامنے احتجاجی دھرنے کو سراہتے ہوئے کہا ہے کہ ہزارہ ڈیموکریٹک پارٹی، نیشنل پارٹی، بلوچستان نیشنل پارٹی اور پختونخواہ میپ نے جس طرح عوام کے حق رائے دہی پر ڈاکہ ڈالنے والوں کے خلاف 17 دنوں تک احتجاجی دھرنا دیا وہ قابل ستائش اور سیاسی مزاحمتی عمل کا ایک تاریخی حصہ ہے۔
انہوں نے کہا کہ ہم نے جمہوریت میں مداخلت اور عوامی رائے کی بے حرمتی اور الیکشن میں سیٹوں کا سودا کرنے والے سرکاری اہلکاروں کے کرپشن اور قومی خیانت کو دنیا کے سامنے ایکسپوز کیا۔ ہم نے آئین و جمہوریت کو پامال کرنے والے اس بوسیدہ نظام کے پیچھے چھپے ہوئے چہروں سے نقاب اتارنے میں اپنا سیاسی کردار بخوبی ادا کر دیا ہے۔
انہوں نے ان تمام جمہوریت دوست وکلا، تاجر برادری، طلبا تنظیموں، سیاسی کارکنوں اور عوام کے تعاون کا شکریہ ادا کیا ہے جنہوں نے اس دھرنے میں شرکت کی، شٹر ڈان ہڑتال کو کامیاب کیا، ریلی اور پہیہ جام ہڑتال کے ذریعے عوام کے ووٹوں سے کھلواڑ کرنے والے سرکاری اہلکاروں کے خلاف اپنے نفرت اور غم و غصے کا اظہار کیا۔ انہوں نے سیاسی کارکنوں اور چار جماعتی اتحاد کے قائدین کی کاوشوں کو بھی خراج تحسین پیش کرتے ہوئے کہا ہے کہ ہم جمہوریت کی بقا کی خاطر ہر مشکل گھڑی میں عوام کے ساتھ کھڑے ہیں اور کسی ظلم اور ناانصافی کو ہرگز برداشت نہیں کریں گے۔ حالیہ دھاندلی زدہ الیکشن بلوچستان کے سنگین مسئلے کو مزید سنگین بنانے کا موجب ہوگا اور ہمیں ہر اس طاقت کے خلاف ہمیشہ متحد رہنا ہوگا جو بلوچستان کے وسائل اور زیر زمین معدنی زخائر کو مال غنیمت کی طرح لوٹ رہی ہیں اور جنہیں بلوچستان کے عوام کی بجائے یہاں کے معدنیات اور ساحل سے غرض ہے اور جس کی ناقص پالیسیوں کی وجہ سے بلوچستانی عوام شدید احساس محرومی اور پسماندگی کے شکار ہیں۔
