وش ویب : نگران کابینہ کے اجلاس سے خطاب میں نگران وزیر اعظم انوار الحق کاکڑ نے کہا ہے کہ نگران حکومت کے مختصر وقت میں کابینہ نے بہترین کارکردگی دکھائی، ہم ملکی معیشت کو پہلے سے بہتر حالت میں چھوڑ کر جا رہے ہیں۔ ہم منتخب حکومت کیلئے ایک ایسا لائحہ عمل دے کر جا رہے ہیں جو یقینی طور پر عوام اور قومی مفاد کیلئے مفید ثابت ہوگا۔
کابینہ اجلاس کے بعد جاری اعلامیے کے مطابق وزیر اعظم نے کہا کہ ہمیں پاکستان کے ترقی و استحکام کیلئے مل کر کام کرنا ہے، نگران حکومت کے تمام فیصلوں اور پالیسی سازی میں ملکی مفاد کو ہمیشہ اولین ترجیح دی گئی۔
اعلامیے میں کہا گیا کہ اجلاس میں کابینہ نے مختلف اداروں کی تنظیم نو، بیرونی سرمایہ کاری کے فروغ اور کاروبار کو سہولیات فراہم کرنے کے حوالے سے نگران حکومت کے اقدامات پر اطمینان کا اظہار کیا۔
کابینہ سیکرٹری نے وفاقی بیوروکریسی کی جانب سے وزیراعظم کی مدبرانہ قیادت کو سراہتے ہوئے کہا کہ ملک کو درپیش اہم چیلنجز میں آپ کی طرف سے ملکی مفاد میں اہم اور مشکل فیصلے لیے گئے جن کے دور رس نتائج نکلیں گے۔
