وش ویب : چیف جسٹس سندھ ہائی کورٹ نے انتخابات میں مبینہ دھاندلی کے معاملات پر صوبے بھر میں الیکشن پٹیشن کی سماعت کے لیے ٹریبونلز تشکیل دے دیے۔
اس ضمن میں رجسٹرار سندھ ہائی کورٹ نے نوٹیفکیشن جاری کر دیا۔
نوٹیفکیشن کے مطابق کراچی ڈویژن کے لیے پرنسپل سیٹ ہائی کورٹ میں الیکشن پٹیشن کی سماعت ہو گی، جس کے لیے 2 بینچ تشکیل دیے گئے ہیں۔
بینچ ون جسٹس محمد کریم خان آغا، جبکہ بینچ ٹو جسٹس عدنان اقبال چوہدری پر مشتمل ہو گا۔
سکھر ڈویژن میں الیکشن پٹیشن کی سماعت جسٹس محمد اقبال کلہوڑو کریں گے،حیدر آباد ڈویژن میں الیکشن پٹیشن کی سماعت جسٹس امجد علی سہتو کریں گے، لاڑکانہ ڈویژن میں الیکشن پٹیشن کی سماعت جسٹس محمد سلیم جیسر کریں گے۔
نوٹیفکیشن کے مطابق الیکشن کمیشن سندھ نے الیکشن پٹیشن کی سماعت کے لیے ٹریبونل کی تشکیل کے لیے سندھ ہائی کورٹ کو خط لکھا تھا۔ ٹریبونلز انتخابات میں ہونے والی مبینہ دھاندلی سے متعلق درخواستوں کی سماعت کریں گے۔