کوئٹہ (بلال فیروز): جماعت اسلامی بلوچستان کے امیر مولانا عبد الحق ہاشمی نے جنرل سیکر ٹری زاہد اختر بلوچ سمیت دیگر کے ہمراہ کوئٹہ میں پریس کانفرنس سے خطاب کر تے ہوئے کہا کہ ہمیں امید تھی کہ 2024 کے انتخابات صاف اور شفاف ہونگے لیکن انتخابی نتائج ہمارے امیدوں کے برعکس آئے اور ہمیں مایوسی بھی ہوئی ہے ۔ انہوں نے کہاکہ جماعت اسلامی کے امیدوار پہلی مرتبہ بلوچستان اسمبلی کے رکن منتخب ہوئے حق دو تحریک کے صدر مولانا ہدایت الرحمان بھی جماعت اسلامی کے مختلف عہدوں پر فائز رہے ہیں میں جعفر آباد کے لوگوں کو خراج تحسین پیش کرتا ہوں کہ انہوں نے غلامی کی زنجیریں تھوڑدی.
ہمارے قومی اسمبلی کے امیدوار حسین واڈیلہ کامیاب تھے مگر دھاندلی کرکے انہیں ہرایا گیاہے۔انہوں نے کہاکہ 2024 کے عام انتخابات میں مخصوص لوگ کامیاب کئے گئے ہیں اب سیاست میں مداخلت بند کی جائے، عدلیہ بھی کسی اور کے خوف سے فیصلے دے رہی ہے ۔ انہوں نے کہاکہ الیکشن کمیشن بھی حوش کے ناخن لیں اور حق حقدار کو دے ایک منصوبے کے تحت ملک بھر میں جماعت اسلامی کو قومی اسمبلی اور سینیٹ سے دور رکھا جا رہا ہے۔