وش ویب:کوئٹہ، قلات(یو این اے )قلات میں سردی کی شدت مزید بڑھ گئی، پارہ منفی 4 تک گر گیا، کوئٹہ میں بھی شدید سردی درجہ حرارت منفی 3 ریکارڈ کیا گیا۔ شدید سردی کے باوجود بھی گیس مکمل غائب، بجلی کی آنکھ مچولی جاری،عوام کو مشکلات کا سامنا۔ سردی کی وجہ سے لوگ گھروں میں محصور ہوکر رہ گئے۔
دوسری جانب اورماڑہ میں حالیہ بارشوں سے کئی گاﺅں صفحہ ہستی سے مٹ گئے، جاپری مکمل طور پر زیرِ آب، لوگوں کے گھر بار تباہ، مال مویشی سیلاب کی نذر ہو گئے، متاثرین مدد کے منتظرحالیہ بارشوں سے اورماڑہ کے کئی گاﺅں صفحہ ہستی سے مٹ گئے ہیں۔ سیلاب کی وجہ سے اورماڑہ کے کئی گاﺅں سمیت بسول کے علاقے جاپری اب بھی زیرِ آب ہے۔ موضع جاپری میں شدید طغیانی اور سیلاب نے لوگوں کے گھر بار تباہ کر دیئے، کھانے پینے کی اشیا اور ضروریات کی تمام چیزوں سمیت لوگوں کے مال مویشیوں تک کو سیلابی ریلا اپنے ساتھ بہا کر لے گیا۔ جاپری مکمل طور پر پانی میں ڈوب چکا ہے۔ لوگوں کے کھانے پینے اور دیگر ضروریات کی اشیا سیلاب میں بہہ جانے سے قوی خدشہ ہے کہ متاثرہ علاقے میں بھوک اور افلاس سے لوگوں کی قیمتی جانیں خطرے میں پڑ سکتے ہیں۔ مذکورہ متاثرہ علاقے میں سیلاب متاثرین بے یار و مددگار حکومتی امداد کے منتظر ہیں۔